菊梓喬迴避與吳保錡緋聞 指「少了聯絡」

【本報訊】菊梓喬（Hana）近日與吳保錡緋聞傳得正盛，昨日她和鄭俊弘（Fred）出席慈善籌款活動。Hana被問到感情問題時，透露最近與保錡少了聯絡。

菊梓喬現身活動時面色麻麻，原來乘車途中身體不適險暈低，解釋本身好易暈車浪，剛才坐的車好像海盜船般，所以有點不舒服。她因易暈車浪從不玩機動遊戲，連「咖啡杯」都不敢玩，去主題樂園多數玩夾公仔。

有否男仔約她去樂園？菊梓喬笑言自己已一把年紀，沒有人約，聲稱拍拖經驗少，不知拍拖有什麼活動可做。提議可約人跑步？她贊同跑步有益，但尚未開始，因為跑步要好認真，不是落街跑兩個圈就算，要有原因先去跑。

緋聞男友保錡居於大埔，熱愛跑步，問菊梓喬會否入大埔跑步？居於荃灣的她拒絕：「點解要去咁遠？我家樓下都有勁多男仔除衫跑步，想我點樣呢？我有時揸緊車㗎嘛，咁樣好辛苦㗎！」問到與保錡的進展？菊梓喬先扮傻說：「我嘅病情冇乜進展，因為搵唔到中醫。」之後「落閘」稱不講感情事迴避，又故意扯開話題，說最近想專心創作新歌，減少玩社交平台，跟保錡很少聯絡。

同場的Fred透露患有「天使綜合症」的兒子近日的病情進展說：「兒子日日都有做唔同治療，最近開始識得爬及可以扶住企起身，係一個好大進步，我見到兒子進步，令我見到希望，冇初時咁絕望，現在好多事情都會放手，讓兒子自己去做。」他透露月底將會與太太帶兒子到美國出席一個關於「天使綜合症」的講座。