目錄

14.8 C
Sydney
Wednesday 23 September 2020

Classified.acd.com.au

Property.acd.com.au

Subscriptions

Covid-19 in Australia
1,870
Total active cases
Updated on 2020-09-23 8:46 am
Home 娛樂 馮盈盈承認與鄭衍峰

馮盈盈承認與鄭衍峰

0
馮盈盈承認與鄭衍峰
馮盈盈在網上演技班進修演技。

【本報訊】馮盈盈在近日熱播中的劇集《反黑路人甲》中,首次擔正演出,飾演督察「Madam Koo」,升上女一的盈盈更直言對事業有野心,希望成為全能藝人,她自言愛唱尹光的歌,更不排除唱Rap闖歌壇。盈盈亦暢談與節目主持鄭衍峰的關係。
《反》劇大玩經典電視及電影橋段,盈盈表示當初知道會有少少類似《喜劇之王》的劇情後,都有想過以搞笑、浮誇的方法去演繹,因她從小就喜歡睇周星馳的電影,但後來發覺這個做法是錯的,跟整個劇情不配合,於是就改用認真、沉穩的方法去演,觀眾可能會覺得認真去做反而更有喜感。而劇集播出後,觀眾的反應亦如她所料。
拍劇與浩信交流得很好
談到拍劇的難忘事,盈盈直言除了在中環除剩Bra一場戲有點尷尬外,最難忘是拍爆破、槍擊及飛車場面,因為全都是親身上陣:「拍中槍場面要裝反應彈喺身上,之後有專人㩒掣,喺心口爆炸流啲假血漿出嚟,真係好驚,所以表情都係自然反應唔使扮,記得細個睇好多荷里活動作電影,覺得裏面啲爆炸場面好神奇,拍嗰時自己好似置身返嗰啲驚險場面,驚險但都幾好玩,有機會都想再拍。」
劇中盈盈為查案無所不用其極,更愛上由王浩信扮演的臥底「張細倫」, 已第三度跟王浩信合作的盈盈,笑言之前兩次《溏心風暴3》及《解決師》都只是名義上合作,到今次兩人才正式有對手戲,她大讚浩信是個專業的演員:「浩信好專業,又係一個好好嘅前輩,因為大家都想拍出來效果有喜感,埋位前浩信就問我作為後生仔節目主持,想了解一下關於時下後生仔嘅思維,希望可以將呢個元素放入戲裏面,又會問我作為新演員有冇一啲idea畀到佢刺激出新火花,佢呢種態度好值得我學習,同我之前睇佢啲戲印象好唔同,最記得第一日開工,都係浩信主動上前同我打招呼同傾偈,令我覺得有啲唔好意思,我呢個後輩應該主動多啲至啱。」
交功課連續喊足4周
兩年前初出道的盈盈成功揮低麥明詩、湯洛雯及張曦雯等奪得「飛躍進步女藝員」,其後一劇接一劇,更成為劇集女一,未有接受過正統演戲訓練的盈盈,自知演技上有不足之處,之前更抽空上「旦哥」鄭丹瑞的網上演技班進修演技,更有影后級人馬惠英紅及視后胡定欣擔任星級老師分享演戲心得,令她獲益良多,不過盈盈自爆做功課做到爆喊:「每星期我都要拍一段短片交功課,其中一份功課,我連續喊足4個星期,仲喊得好淒涼,不過旦哥畀我嘅評價係『冇思考』,而朋友知道就話我攞苦嚟辛,輕輕鬆鬆咪好,做乜搞到自己好似好淒涼,但我覺得今次上演技班,唔單止學到演技,仲學識剪接、字幕、效果,係一個好大挑戰,好彩畢業功課旦哥都有讚我有驚喜,所以辛苦都係值得,而今次不單係演技課程,簡直係《人生改造課程》。」
盈盈又直言對業事有野心:「我希望自己全能發展,走得更遠,成為專業演員,又係出色主持,有時間的話仲想向唱歌方面發展,自覺歌喉幾好,幾獨特,我鍾意唱尹光老師啲歌,我會認真考慮向Rap歌方面發展。」
性格開朗、健談、爽直的盈盈,做訪問可以直落45分鐘說個不停,不過其實有苦自己知:「 鏡頭前我要健談、帶動氣氛、大家嘅情緒,有時呢個形象都有壓力。私下靜落嚟我係比較少說話,因為好攰,都想有安靜一刻,甚至返到屋企唔想理睬其他人,之後我喺書睇到,明白呢個只不過係自己畀自己嘅諗法,搞氣氛呢個諗法可能唔係人哋想要。」
擇偶最緊要相處舒服
談到感情事,盈盈去年底與醫生男友分手後,她與鄭衍峰(Leonard)的緋聞愈傳愈盛,她亦不諱言對愛情抱開放態度,不抗拒有新戀情,因感情對她來說好重要,尤其當工作上遇到壓力,身邊有可信任又愛自己的人聽自己傾訴及分擔是好重要的,否則將心事積埋在心中,對心理都唔健康。問到再拍拖會否公開?盈盈大方笑說:「如有好消息都會好坦誠向大家公布,但開始前會慎重觀察對象,唔會再好似以前,只要啱feel或符合我特定條件:夠搞笑就開始拍拖,(擇偶條件?)𠵱家要相處舒服最緊要,但就真係要啲時間相處,咁樣至會長久。」
當問到跟Leonard相處可舒服,盈盈即如數家珍大讚對方:「佢係個好男仔、好聰明、有好多諗法、做事深思熟慮,唔同我性格,我做事比較直率、憑直覺又衝動,一凹一凸可以互補不足,好多事我都有向佢請教意見。」至於何時才可公布好消息,盈盈笑指這要看時機,因Leonard也有缺點的,就是諗得太多,行動較慢。不過最後她補充一句,指Leonard都是可以發展的對象,看來二人很快就有好消息傳出。